பசங்க, ரெட்டச்சுழி... பின்னே இந்த நீயும் நானும்! சிறிசுகள் ஓட, அவர்களின் பின்னே ஏர் பூட்டிய மாதிரி ஓடுகிறது படமும். நடுவே கொஞ்சம் காதலையும் கலந்து யூத்துகளின் கன்னத்திலும் லேசாக 'இச்' கொடுத்திருக்கிறார் இயக்குனர் எஸ்.வி.சோலைராஜா.
பள்ளி ஒன்றிற்கு நடன ஆசிரியராக வருகிறார் சஞ்சீவ். அங்கே சற்றும் எதிர்பாராத மழலை மேதை ரின்சனை சந்திக்கிறார். பேப்பர் போடுவதில் ஆரம்பித்து, இரவில் கொசுவர்த்தி சுருள் விற்கிற வரைக்கும் ட்வெண்ட்டிபோர்ஸ் ஹவர் உழைப்பாளியான அந்த பையனின் ஒரே லட்சியம் பணம் சேர்த்து எப்படியாவது விட்டுப்போன படிப்பை தொடரவேண்டும் என்பது. சஞ்சீவியின் புண்ணியத்தில் அவர் ஸ்கூலிலியே சேர்கிறான் இலவசமாக. பள்ளியின் கரஸ்பான்டட் சம்பத் மகன் சச்சினுக்கும் ரின்சனுக்கும் நடனப் போட்டி வருகிறது. இந்த போட்டியில் வென்றால் ஆறு லட்சம் பணம் கிடைக்கும். அம்மாவுக்கு ஆபரேஷன் செய்து அவரை காப்பாற்றலாம் என்பது ஏழை ரின்சனின் எண்ணம். ஆனால் தனது ஸ்கூலில் இருந்து தனது மகன் சச்சினைதான் தேர்வு செய்து அனுப்ப வேண்டும் என்கிறது முதலாளி சம்பத்தின் குடும்பம். முடியாது என்று மறுக்கும் சஞ்சீவி அந்த பள்ளியில் இருந்து விலகி, ரின்சனுடன் கார்ப்பரேஷன் ஸ்கூலில் தஞ்சமடைகிறார். குப்பத்து மாணவர்களையும் ஆட்டத்தில் சேர்த்துக் கொண்டு ஆறு லட்சத்தை அள்ளிக் கொண்டு போவதுதான் க்ளைமாக்ஸ். அப்படின்னா காதல்...? அது தனி லக்கேஜுங்க!
டான்ஸ் மாஸ்டராக சஞ்சீவி. மனிதருக்கு துறுதுறு முகம். நடனத்திலும் மாஸ்டராக இருப்பார் போலிருக்கிறது. காதல், பைட் என்று சினிமாவுக்கு தேவையான பிற விஷயத்திலும் எபவ் ஆவரேஜ்தான். அதற்காக வந்து ரெண்டே நாளில் கரஸ்பான்டன்டின் உறவு பெண்ணையே லு£ட் அடிப்பதெல்லாம் நம்பிக்கை துரோகம் சாமி. ஹீரோயின் சேத்னாவின் லோ-ஹிப், ரொம்ப அபாயகரமான அழகு. பல நேரங்களில் நடிப்பை விட இந்த 'லோ லோ'வைதான் அதிகம் நம்பியிருக்கிறார் அவர்.
குழந்தைகள் அதிகம் பேசினால் ஒருவித எரிச்சல் வரும். தமிழ்சினிமா குழந்தைகள் பல படங்களில் அப்படிதான் இருக்கிறார்கள். ஆனால் ரின்சன் அப்படியல்ல. நெஞ்சை அள்ளுகிறான். எப்படியாவது இவன் ஜெயிக்க வேண்டும் என்ற பிரார்த்தனையை அநேகமாக எல்லா ரசிகர்களுமே செய்திருப்பார்கள். நடனத்திலும் குட்டி பிரபுதேவாவாக சுழன்றிருக்கிறான். இவனது எதிர் கோஷ்டி ஹீரோ சச்சினின் நடனமும் சளைத்ததல்ல ரின்சனின் நடனத்துக்கு.
மனதை கவரும் இன்னொரு நபர் அந்த ஊனமுற்ற வாலிபர்தான். கால்கள் இரண்டையும் எட்டு போல் வளைத்து வினாடியில் தோளில் போட்டுக் கொள்வதும், பேய்த்தனமாக ஆடுவதும் பிரமிப்பு பிரமிப்பு. நம்பிக்கையூட்டும் வசனங்களை இவர் வாயை திறந்து கூட பேசியிருக்க அவசியமில்லை. பார்த்தாலே புரிய வைக்கிறார்.
போட்டியை அறிவித்த பின் ரிகர்சல், ஆட்டம் என்று போகாமல் சஞ்சீவும், சேதனாவும் ஆள் பிடிக்க அலைவதும், அந்த குப்பத்து சிறுவர்களின் லோ-கிளாஸ் பேச்சுகளும் அருவருப்பு. அதிலும் இந்த ஆட்டத்தை கலைக்க வரும் அடியாட்களுக்கு இவர்கள் தரும் பதிலடி அருவறுப்பின் உச்சம். சிங்கமுத்து, அல்வா வாசு காமெடிகள் ரசிக்க வைக்கின்றன.
புருவ மத்தியில் கொஞ்சம் சிரிப்பை நிறுத்தி மையமாக முடிவெடுக்கும் சம்பத், நிஜமாகவே மிரள வைத்திருக்கிறார். ஹீரோயினின் முறைப் பையன் வதன் சர்ர்ர்ரியான சைக்கோ! ட்ரெட் மில்லில் ஏறி ஓடி பொசுக்கென்று அதிலேயே விழுந்து கிடப்பது செம காமெடி.
ஸ்ரீராம் விஜய்யின் இசையும், பிரேம் சங்கரின் ஒளிப்பதிவும் திருப்தி.
நீயும் நானும் போட்டா போட்டி!
-ஆர்.எஸ்.அந்தணன் |
